ყველაზე უცნაური დიზაინის ავეჯი

ავეჯი გადამწყვეტ როლს თამაშობს ნებისმიერი ოთახის ინტერიერში და მასში შეაქვს ხიბლი, სტილი და ინდივიდუალურობა. თუკი ის შემოქმედებითად არის შექმნილი, ავეჯს შეუძლია ადამიანის განწყობაზეც იმოქმედოს. ფერთა მრავალფეროვნება, საუცხოო დიზაინი და გასაოცარი იდეები - ამ ყველაფერს შეუძლია ნებისმიერი ჩვეულებრივი გარეგნობის ავეჯი ხელოვნების ნიმუშად აქციოს. მაგალითად, როგორიცაა ინგლისელი დიზაინერის, თომას ჰეზერვიკის მიერ დაპროექტებული "ბზრიალა" სავარძელი. ის შეიქმნა, როგორც ექსპერიმენტი იმის დასანახად, შეიძლებოდა თუ არა ლითონის ტრიალის პროცესის გამოყენება დასაჯდომის შესაქმნელად. მზა პროდუქტი გამოვიდა სრულიად სიმეტრიული მბრუნავი ფორმა, რომელიც იმუშავებდა როგორც სკამი, მიუხედავად იმისა, თუ რა მიმართულებით მოატრიალებდით მას.

და მაინც, უნიკალურობა გამბედაობასაც მოითხოვს. როდესაც ჩვენ ვხედავთ რაიმე განსაკუთრებულად უცნაურს დიზაინში, ხშირად, რამდენიმე დამატებითი წამი გვჭირდება ხოლმე დასაფიქრებლად, აღსაქმელად ან, სულაც, მშვენიერი უცნაურობით დასატკბობად. მაგრამ არსებობს მნიშვნელოვანი განსხვავება შეფასებასა და გამოყენებას შორის; ყველა უნიკალური დიზაინის ავეჯი არ შეესაბამება ჩვენი საკუთარი სახლების კარგად დაგეგმილ ესთეტიკას. მაშ, რა არის უნიკალურობის ის ზღვარი, საიდანაც იწყება ავეჯის უჩვეულობა, დაწყებული გასაოცარიდან არაჩვეულებრიობამდე.

კირჩოფის სავარძელი

Latitude Run-ის Kirchoff-ის ეს აბლაბუდისებრი სავარძელი დამზადებულია შავი ლითონის ჩარჩოსა და კაბელებისგან. მხოლოდ გარეგნობიდან გამომდინარე, შეიძლება რთული იყოს იმის თქმა, არის თუ არა ეს ავეჯი კომფორტული დასაჯდომად, და, მიუხედავად იმისა, რა თქმა უნდა, არასოდეს მოგინდებათ, რომ შემთხვევით ჩაგივარდეთ ტელევიზორის პულტი ან ტელეფონი მის ცენტრში, რადგან მის ამოღებას ნამდვილად ძალიან დიდი დრო დასჭირდება.

კვარცის სავარძელი

წინა დასაჯდომთან შედარებით, D3CO-ის მიერ შექმნილი კვარცის სავარძელი ჰგავს სკამს, რომელშიც საკმაოდ სასიამოვნო იქნებოდა ჩაყვინთვა. აღნიშნული სავარძელი ხელმისაწვდომია რამდენიმე ფერში და სხვადასხვა ქსოვილისა და რბილი ტყავის ზედაპირით. ეს სავარძელი განასახიერებს თანამედროვე იტალიურ დიზაინს და აქვს უნიკალური გეომეტრიული ფორმა, რომელიც შთაგონებულია ლეონარდო და ვინჩის ნამუშევრებით. ჩარჩო არის მყარი გამხმარი წიფლის ხე ხელნაკეთი ალუმინის შეერთებებით, ხოლო თითოეული უნიკალური "კრისტალური" ჩანართის შესაქმნელად გამოიყენება ბუნებრივი ზეთისა და ქაფისგან დამზადებული ბალიშები.

ავანგარდული სკამი

დიმიტრი სამიგინის ავანგარდული დასაჯდომი ახერხებს ერთდროულად გამოსცეს როგორც მდგრადი, ასევე სახალისო ხასიათი, ამასთან ერთად კი, ის გამოიყურება, როგორც რუბიკის კუბზე დაფუძნებული ერთხელიანი სკამი. იგი შთაგონებულია ჰოლანდიელი ავეჯის დიზაინერისა და არქიტექტორის, გერიტ რიტველდის ნამუშევრებით, ასევე ბაუჰაუსის სტილით, რომელიც, როგორც წესი, აბსტრაქტულ, გეომეტრიულ ესთეტიკას ასახავს. 

“კარგი ვიბრაციების შესანახი მოწყობილობა” 

არა, ეს არ არის დაბრეცილი ან დამახინჯებული ციფრული გამოსახულება, არამედ კარადა, რომელიც ჩახლართულად არის მოჩუქურთმებული, რათა სწორედ ასე გამოიყურებოდეს. იტალიელი დიზაინერის, Ferruccio Laviani-ის მიერ შექმნილი ავეჯის ბრენდისთვის Fratelli Boffi-სთვის, ეს კარადა დამზადებულია მოჩუქურთმებული მუხის ხისგან სპეციალური აპარატის გამოყენებით. 

მაგნიტური მცურავი საწოლი 

ჰოლანდიელი არქიტექტორის, იანჯააპ რუისენაარსის მაგნიტური მცურავი საწოლი საშუალებას მოგცემთ, თავი იგრძნოთ ცნობილ პერსონაჟ ალადინად, რომელიც მის მფრინავ ხალიჩაზე ზის. საწოლი აგებულია მუდმივად მაგნიტური მასალისგან, რომელიც უძლებს დაახლოებით 900 კგ წონას ჰაერში. ყველაზე კარგი კი ის არის, რომ მას არ სჭირდება ელექტროენერგია საწოლის ცურვის შესანარჩუნებლად, ის საწინააღმდეგო მაგნიტების ძალისხმევით ლევიტირებს.

რბილი კარადა

წიგნები, თეფშები და ჭიქები არის მოქცეული ჰოლანდიელი დიზაინერის Dewi van de Klomp-ის რბილ კარადაში, რომლებიც დამზადებულია ქაფის რეზინისგან. რბილი კარადები წარმოიშვა სხვადასხვა მასალების კვლევის შედეგად, რომლებიც შეიძლება მოიძებნოს სახლში და სხვაგვარად შეუმჩნეველი დარჩეს. ერთ დღესაც, ავეჯის დიზაინერი წააწყდა ქაფიანი რეზინის კაშკაშა ვარდისფერ ნაჭერს - მასალას, რომელიც, ჩვეულებრივ, გამოიყენება მანქანის სავარძლებისა და კედლის იზოლაციისთვის - და "შეიყვარა" მისი პოტენციალი. ქაფის უნიკალური ტექსტურის, ფერისა და ფორმის დახმარებით, მან დაიწყო ექსპერიმენტების ჩატარება სხვადასხვა საგნის სერიის დასამზადებლად.

დამდნარი ბეტონის სავარძელი 

ნიუ-იორკის Bower Studios-მა შექმნა დასაჯდომი ბეტონის ზედაპირით, რომელიც მეტალის საყრდენზეა დაფენილი და იატაკზე ნაკეცებს ქმნის. ბეტონს აქვს მრუდი ფორმა, თითქოს დამდნარი იყოს. სტუდიომ გადაწყვიტა შეექმნა დიზაინი, რაც ბეტონს მისცემდა განსაკუთრებულ თვისებას, რომელიც, ჩვეულებრივ, არ არის დაკავშირებული ამ მასალასთან. მიუხედავად იმისა, რომ თხევადად გამოიყურება, ის მყარად იდგმება ადგილზე. 

ავეჯი-ტილო

როცა ამ ავეჯს წინიდან უყურებთ, ის ტილოს ნახატს ჰგავს. მაგრამ როდესაც მიუახლოვდებით, შეამჩნევთ, რომ ეს არის სამგანზომილებიანი ხელოვნების ნიმუში, რომელიც შეიძლება რეალურ დასაჯდომად გამოიყენებოდეს. დასაჯდომ ადგილას არის ელასტიკური ბოჭკო, რომელიც დაჯდომისას იჭიმება. ავეჯი შექმნილია ტოკიოში დაფუძნებული დიზაინის სტუდიის მიერ ალუმინისა და ხის გამოყენებით. ხელოვნებისა და ავეჯის ერთგვარი ნაზავი.

სკამი სავარძლის შიგნით

ეს ნამუშევარი კი შექმნილია ფლავიო სკალცოს მიერ და საკმაოდ დამაინტრიგებელ ქმნილებად ითვლება. სკულპტურული იერის მქონე სკამი თანამედროვე და მარტივი დიზაინისაა, მის შიგნით კი იმალება კიდევ ერთი სკამი იმავე დიზაინით. დიზაინერის აზრით, ამ დამატებითი ფუნქციური დატვირთვით, ყოველთვის შეგეძლებათ, რომ გქონდეთ დამატებითი სკამი თქვენი სტუმრებისთვის.

პუფი - Joe Ball 

ბეისბოლის ლეგენდარული მოთამაშის, ჯოზეფ პოლ "ჯო" დიმაჯიოს ორმოცდამეათე წლისთავისთვის ავეჯის დიზაინერებმა შექმნეს Joe Ball - ტყავის სავარძელი და პუფი, რომელთა ფორმა და ნაკერიც კლასიკური ბეისბოლის ბურთის მსგავსია. სავარძელი დამზადებულია იტალიაში არსებული საუკეთესო ტყავისგან, ისევე, როგორც ხელთათმანის ფორმის დასაჯდომი.

“გრუხუნი”

ამ დივნის დიზაინი მომდინარეობს მე-19 საუკუნის მხატვრების დიდ სივრცეში ცხოვრების გამოცდილებიდან, სადაც ავეჯი შესაბამისობაში უნდა ყოფილიყო არა ადამიანის, არამედ ადგილის მასშტაბიდან გამომდინარე. ეს არის ობიექტი, რომელიც არღვევს როგორც ფორმას, ისე ფუნქციას და თითოეული სიტუაციისთვის იძენს თავისებურ მნიშვნელობას.

ორი ტალღა

1967 წელს შექმნილი ფლორენციული რადიკალური ჯგუფის Archizoom-ის მიერ შექმნილი დინამიკური Superonda იყო პირველი დივანი ჩვეულებრივი ტრადიციული ჩარჩოს გარეშე. ის შედგება ორი ტალღისგან, რომელიც დამზადებულია ორ ნაწილად გადაჭრილი პოლიურეთანის ბლოკისგან, რომლებიც ერთმანეთში ჯდება სხვადასხვა კონფიგურაციის შესაქმნელად. 

ინოვაციური და უნიკალური ავეჯი სცილდება თანამედროვე კანონზომიერებებსა და კონცეფციებს. ავეჯის ეს ახალი კრეატიული დიზაინი იყენებს ახალ მასალებსა და ტექნიკას - სწორედ ეს ქმნის ავეჯის უჩვეულო გარეგნობას, აქედან გამომდინარე კი კულტურას, რომელიც გავლენას ახდენს ინტერიერის დიზაინზე და, შესაბამისად, იმ სივრცეებზე, რომლებშიც ადამიანები დროს ვატარებთ. ყველაფერთან ერთად კი, მსგავსი უჩვეულო ნივთები მარტივად შეიძლება გახდნენ შთაგონებისა და ახალი იდეების წყარო, რათა მოგვცენ განსხვავებული მიმართულება ჩვენი სახლების გამორჩეულობისკენ.