ცნობილი ადამიანების აჩემებული ავეჯი ინტერიერის დიზაინისა და სახლის დეკორის სამყარო მუდმივად ვითარდება. ხშირად კი, ამ განვითარებაზე ჩვენთვის საყვარელი ცნობილი ადამიანების გემოვნება ზემოქმედებს. ეს ადამიანები, როგორც წესი, განთქმული არიან თავიანთი მდიდრული ცხოვრების წესით და გამორჩეული სტილით. ისინი აწყობენ თავიანთ საცხოვრებელ ადგილებს ყველაზე ინოვაციური თუ საკულტო ავეჯით. მოდით, ვიმოგზაუროთ ცნობილი ადამიანების სახლებში და დავათვალიეროთ მათ მიერ შერჩეული ავეჯის საკულტო ნაწილები, რომლებიც ამშვენებენ მათ ელეგანტურ სივრცეებს. მარიო ბელინის B&B Italia Camaleonda B&B Italia Camaleonda პირველად შეიქმნა იტალიელი არქიტექტორის, მარიო ბელინის მიერ 1970-იან წლებში, თუმცა დღემდე დიდი პოპულარობით სარგებლობს ცნობილ ადამიანებში. დაწყებული მოდის დიზაინერიდან, მარკ ჯეიკობსიდან, მოდელ ელზა ჰოსკამდე, ეს დივანი შეინიშნება გემოვნების შემქმნელების მრავალ ინტერიერში. თავისი მრგვალი კონტურებითა და რბილი ქსოვილით, Camaleonda ქმნის სიმყუდროვის შეგრძნებას. კაბელებისა და რგოლებისგან შემდგარი სისტემის მეშვეობით კი, დივანი მოგცემთ საშუალებას, შეუფერხებლად გარდაქმნათ მისი განლაგება საჭიროებების შესაბამისად.
გაეტანო პეშჩეს UP Chair UP Chair არის დიდი და კომფორტული, საშვილოსნოს მეტაფორა, მასზე მიბმული სფერული პუფით. დიზაინერის აზრით, ის წააგავს ნაყოფიერების ქალღმერთების უძველეს ქანდაკებებს. ამიტომ, სავარძელი მიიჩნევა ქალის უფრო ფიგურალურ გამოსახულებად, რომელსაც ფეხზე აბია ჯაჭვი და ბურთი. სკამი ჩნდება ფილმის - "ბონდი: ბრილიანტები სამუდამოდ" - სცენაში. ამასთან ერთად კი, მისი აღმოჩენა შესაძლებელია თავად დიზაინერის, გაეტანო პეშჩეს სახლში.
პიერ პაულინის Tongue Chair 1960-იანი წლების ბოლოს პლასტმასის ფორმირებისა და პოლიურეთანის ქაფის განვითარებამ რადიკალურად შეცვალა ავეჯის საერთაშორისო ინდუსტრია. ენის ფორმის სავარძელი შედგება მეტალის კარკასისგან, რომელიც დაფარულია ქაფით და სხვადასხვა ფერის ელასტიკური მასალით. ფრანგი დიზაინერის, პიერ პაულინის ნამუშევრები ადგილს იკავებენ როგორც კოლექციონერების, ისე ხელოვნების დამფასებელთა სახლებში. მათ რიცხვს მიეკუთვნებიან ისეთი ცნობილი სახეები, როგორებიცაა რიანა, ტრევის სკოტი და კანიე უესტი.
მიშელ დუკაროის სავარძელი Togo დახვეწილი და ძვირადღირებული სავარძელი Togo ფრანგმა მიშელ დუკაროიმ 1973 წელს დააპროექტა, კბილის პასტის ტუბის ფორმის შთაგონებით. 60-იან წლებში ახალ მასალებზე ექსპერიმენტების შემდეგ, რომელთა შორის იყო ქაფი, პოლიესტერი და წარმოების ინოვაციური ტექნიკა, მან საბოლოოდ მოიფიქრა დღეს უკვე ცნობილი Togo-ს სავარძელი. სავარძელი დღემდე დიდი პოპულარობით სარგებლობს. მისი მფლობელები არიან სტილისტი ნატ ტერნბული და ფოტოგრაფი სემ ვონგი. ასევე, ავსტრალიელი ინტერიერის დიზაინერი ლი ელვუდი.
საშა ლაკიჩის სავარძელი Bubble Bubble შექმნილია ფრანგი დიზაინერის, საშა ლაკიჩის მიერ Roche Bobois-ისთვის. სავარძელი არის უზომოდ რბილი და კომფორტული, მისი მხიარული სტრუქტურა კი მოგვაგონებს ბუშტებისგან შემდგარ ღრუბელს. Bubble მშვენიერი ელემენტია ცნობილი ადამიანების სახლებში. სავარძლის ლურჯი ვერსიის მფლობელია Blackpink-ის მომღერალი ჯენი. ხოლო მსახიობ რობერტ დაუნი უმცროსს თავისი მალიბუს სახლის მისაღები ოთახისთვის აქვს შერჩეული ხუთადგილიანი ფუმფულა ავეჯი. ცნობილი სახეები განუმეორებელ გავლენას ახდენენ მოდისა და დიზაინის ტენდენციებზე, მათ შორის კი, ავეჯის არჩევანზე. ამით ისინი გვაჩვენებენ, რომ ავეჯი მეტია, ვიდრე უბრალოდ ფუნქციური ნივთი - ეს არის პირადი სტილისა და ფუფუნების ანარეკლი.
როდესაც ჩვენ ვიღებთ შთაგონებას ცნობილი ადამიანებისგან, აუცილებელია გვახსოვდეს, რომ ჩვენ, ასევე, შეგვიძლია შევქმნათ ელეგანტური და უნიკალური საცხოვრებელი გარემო გააზრებულად შერჩეული ავეჯით, რომელიც ეხმიანება ჩვენს პიროვნებასა და პრეფერენციებს. მიეცით საშუალება თქვენს ავეჯს, ასახოს თქვენი ინდივიდუალობა და გადააქციოს თქვენი სახლი ნამდვილ შედევრად.
